Kirgistan – heillandi menning og náttúra

Ferðadagur

Flogið er í með Icelandair til Brussel kl. 07:35 um morguninn og þaðan áfram til Istanbúl með Turkish Airlines. Þriðji leggurinn er frá Istanbúl til Manas flugvallar í Bishkek, höfuðborgar Kirgistan. Lent er kl. 04:30 að morgni næsta dags en þá er klukkan 22:30 að íslenskum tíma. 

Bishkek höfuðborgin - borgarferð

Við lendingu í Bishkek bíða okkur rútur á flugvellinum en um 40 km eru frá flugvellinum til höfuðborgarinnar.

Við innritum okkur á hótel Plaza, sem er 4ra stjörnu hótel og hvílum okkur eftir flugin. Eftir hádegið er farið í borgarferð þar sem heimsækjum Ala-Too torgið sem er hjarta borgarinnar og  þar sem ríkissögusafnið er staðsett.

Bishkek  er þekkt sem grænasta borgin í Mið-Asíu, þökk sé ótal görðum og göngustígum sem gera borgina að frábærum stað til að búa í.

Við heimsækjum einnig hinn fræga Osh bazar markað en um leið og stigið er inn á markaðinn hverfum við inn í austurlenska stemningu með fjölda fólks og mikla fjölbreytni í vörum og litagleði.

Um kvöldið borðum við á skemmtilegum veitingastað í borginni þar sem við fáum að smakka dýrindis kirgiska þjóðarrétti. 

Gist á Plaza hótel um nóttina. https://www.plazahotel.kg/ru/ 

Þjóðgarðurinn Ala Archa

Um morguninn ökum við til þjóðgarðsins Ala Archa sem er í um 40 km fjarlægð frá höfuðborginni. Við skoðum okkur um á þessum fallega stað og virðum fyrir okkur snævi þakta fjallstinda, á og læki með fallega fjallasýn. Við kaupum okkur nesti á leiðinni og verjum bróðurpartinum af deginum á þessum fallega stað. Einnig er möguleiki á að dvelja áfram í Bishkek.

Þegar komið er inn í garðinn verða tvær útfærslur af gönguferðum í boði.  Allir Það ganga saman fyrstu 2 km af leiðinni og svo halda þeir sem vilja lengri göngu áfram með leiðsögumanni og fara hina svokölluðu árleið.

1) Létt ganga, ca. 4 km á malbikuðum göngustíg. Mjög lítil hækkun. Hægt er að rölta um svæðið og njóta þess sem garðurinn hefur upp á að bjóða.

2) 12 km ganga eftir blönduðum stígum. Hækkun ca. 250 m. Ætlaður göngutími er ca. 3,5 klst.

Borðað á fallegum veitingastað í borginni um kvöldið og áfram gist á Plaza hotel.

Akstur: ca 35 km. hvora leið

Burana og Chon Kemin þorpið

Eftir morgunverð skráum við okkur út af hótelinu en búast má við um 200 km akstri yfir daginn. Fyrsti áfangastaður okkar er heimsókn í Burana-turninn sem er forn bænaturn í Chuy-dalnum. Hann er staðsettur um 80 km frá höfuðborginni, nálægt borginni Tokmok. Turninn varðveitir muni úr grafreitum, kastalarústir og þrjú  grafhýsi. Þetta er allt sem eftir stendur af hinni fornu Balasagyn-borg sem var stofnuð af Karakhanidunum í lok níundu aldar.

Hádegisverð borðum við hjá kirgiskri fjölskyldu á svæðinu en höldum svo áfram að Chon Kemin-gljúfrinu er þar er mikil náttúrufegurð og fjölbreytt dýra og- plöntulíf. Við göngum upp að fallegum útsýnisstað þar sem líta má víðáttumikla fjallasýn og er hækkun ca. 200 m.
Þeir sem vilja geta farið fetið á hestbaki (ekki innifalið).

Gist er á gistiheimilinu Jekshen og þar er kvöldverður.

Akstur ca. 170 km yfir daginn.

Bærinn Kyzyl Tuu, arnarveiðar í Bokonbaevo og Ton

Í dag er ferðinni heitið að Yssyk Kul vatninu sem er annað stærsta fjallavatn í heimi.  Vatnið er svo sannarlega stórt og við munum verja næstu dögum víðsvegar í kringum vatnið. Við heimsækjum fjölskyldu í þorpinu Bokonbaevo sem fræðir og sýnir okkur gerð hirðingjatjalda og við fáum að reyna okkur við að reisa eitt slíkt.

Næst er ferðinni heitið til Bokonbaevo, þar sem við fáum að fylgjast með örnum sem sérstaklega eru þjálfaðir fyrir veiðar, en arnarveiði er ein af þjóðarhefðum Kirgisa. Við  hittum fyrir arnaveiðimann með fuglinn sinn og fáum að fylgjast með aðferðum sem notaðar eru við veiðarnar.

Við fáum hádegisverð í hirðingjataldi (yurt) hjá fjölskyldu sem rekur veitingastað þar.

Við höldum svo ferðinni áfram til bæjarins Ton sem stendur við vatnið þar sem við gistum í hirðingjatjaldi í Elestet tjaldbúðunum. Þar er hægt að slaka á og fá sér sundsprett í vatninu. 

Kvöldmatur í tjaldbúðunum

Akstur ca. 180 km yfir daginn.

Ton– Skazka og Jety Oghuz gljúfrið

Við tökum því rólega um morguninn, hægt er að fá sér göngutúr um þorpið Ton eða meðfram vatninu. Þaðan höldum við inn í hið stórkostlega Skazka gljúfur þar sem finna má ótrúlegar klettamyndanir en gljúfur þessi eru oft kölluð ævintýragljúfrin. Stutt ganga um gljúfrið gæti verið um 3 km en nauðsynlegt er að vera með skó með góðu gripi.

Við höldum ferðinni áfram til Jety Oghuz gljúfursins sem er annar fallegur staður með klettamyndanir og landslag sem kallað hefur verið „Sjö nautshöfuð“. Steinninn „broken heart“ varðar innganginn að gljúfrinu á sérstakan og rómantískan hátt. 

Við borðum í hirðingjatjaldi í glúfrinu en höldum svo áfram í næturstað okkar Eco Village þar sem við gistum í næstu tvær nætur. Þar er boðið upp á ýmsa dægradvöl fyrir þá sem vilja, þar er hægt að fá leigð hjól, fara í styttri göngur og sauna.

Akstur ca. 150 km yfir daginn.

Karakol bærinn

Eftir morgunverð heimsækjum við borgina Karakol og skoðum þar fræg kennileiti. Karakol er fjórða stærsta borgin í Kirgistan, en ásýndar er hún frekar þorpsleg þar sem tíminn líður hægt og eins og hann hafi staðnað í Sovét-tímanum.

Við heimsækjum Dungan moskuna, einstaka byggingu sem líkist kínverskri pagóðu. 

Við höldum áfram til rétttrúnaðarkirkju hinnar heilögu þrenningar, sem trékirkja sem byggð er án þess að nota einn einasta nagla. 

Í hádeginu förum við til fjölskyldu af Dungan uppruna þar sem við fáum hádegisverð en fáum líka kennslu í að gera sérstakar Dungan núðlur.

Við förum aftur á gistiheimilið, kannski með viðkomu í minjagripaverslun en eftirmiðdagur og kvöldið er frjálst. Kvöldverður á gistiheimilinu.

Akstur ca. 25 km hvora leið.

Jyrgalan dalur

Eftir morgunverð er ekið um fallega leið inn í hinn afskekkta Jyrgalan dal. Vegurinn liggur um fjallshlíðar og blómlega dali í gegnum lítil þorp sem bjóða upp á skemmtilegt myndefni. Bærinn sem við dveljum í er gamall námubær sem hefur verið breytt í þorp sem þjónar ferðalöngum.

Hádegisverður er á gistiheimilinu en eftirmiðdagurinn er frjáls og um að gera að nota tækifærið og fara í stutta göngu, t.d. upp á fossi sem er í um 4 km fjarlægð en hækkun er um 200 m. Einnig er möguleiki að fara þessa sömu leið á hestbaki með leiðsögumanni. Eins má bara rölta um bæinn og kynna sér hvernig þorpsbúar búa.

Gist á Beymaral gistiheimilinu eða svipuðu. 

Akstur ca. 85 km yfir daginn.

Semenovka glúfrið og Cholpon Ata

Í dag er ferðinni heitið inn í fallegt glúfur þar sem ætlunin er að fara í göngu upp að fjallavatninu Semenovka sem er talinn einn fallegasti staðurinn við Issyk-Kul vatnið. Þar göngum við framhjá furutrjám og grænum fjallshlíðum og heyrum vatnsniðinn í ánum. Málsverður verður í „picnic“ stíl þegar á leiðarenda er komið.

Ganga dagsins: Meðalerfið, nokkur hækkun til að byrja með en svo frekar létt. Lengd: 10 km, 500 m hækkun. Tími: 3-4 klst. Lagt af stað úr 2.100 m hæð og endað í 2.600 m hæð.

Að göngu lokinni förum við til bæjarins Cholpon Ata sem er þekktur sumarleyfisstaður við Issyk-Kul vatnið. Hér áður fyrr fóru vagnar hér í gegn á Silkileiðinni en í dag koma hingað ferðamenn hvaðanæva að úr löndum fyrrum Sovétríkjanna (CIS) til Cholpon-Ata. Hér eru hreinar strendur og tært vatn. 

Kvöldverður og gisting á Olympi hótelinu.

Akstur ca. 205 km yfir daginn

Cholpon Ata - Kochkor – og Son Kul fjallavatnið

Við byrjum daginn á að skoða safn úti undir berum himni sem er á stað þar sem fornar steinaristur fundust. Eftir það keyrum við til bæjarins Kochkor þar sem við kynnumst heimafólki og þeirra lífsháttum. Hér gefst tækifæri til að kynnast listinni við að framleiða hefðbundin filtteppi, sem kallast "Shiyrdak" og "Ala Kiiiz". Aðferðin minnir á ullarþæfingu og afurðin er viðurkennd af UNESCO minjaskrá sem óáþreifanlegur menningararfur.

Blogg um kirgisku filtteppin: https://www.flandrr.is/post/kirgistan-menningararfur

Eftir þessa fræðslu liggur leiðin upp í 3.400 m hæð yfir Moldo Ashu fjallaskarðið. Þaðan komum við niður að Son Kul fjallavatninu sem stendur í i um 3.000 m hæð y.s. Við dveljum hér í Yurt tjaldbúðum við vatnið þar sem við njótum gestrisni hirðingjanna, kynnumst lífsstíl þeirra og siðum. 

Kvöldverður i Bayish tjaldbúðunum þar sem verður einnig gist. Sameiginleg salerni eru í sér aðstöðu, útivið.

Akstur ca. 265 km yfir daginn

Kochkor og höfuðborgin Bishkek

Við byrjum daginn á að fylgjast með Kok-boru hestasýningu sem er þjóðaríþrótt og er einskonar pólo á hestbaki.

Við búum okkur til brottfarar og ökum þessa fallegu leið yfir fjallaskörð í átt að höfuðborginni.

Við stoppum í bænum Kochkor þar sem við fáum hádegisverð hjá fjölskyldu sem þar býr.

Búast má við tæplega 350 km akstri í dag. Þegar komið er til Bishkek innritum við okkur á Plaza hótelið en um kvöldið borðum við saman kvöldverð.

Akstur ca. 350 km yfir daginn

Frjáls dagur í Bishkek og heimferð

Frjáls dagur en mælt er með að heimsækja söfn borgarinnar, svo sem þjóðarsafnið eða listasafnið. Einnig er tækifæri til að fara á markaðinn og gera góð kaup eða bara taka því rólega í borginni. 

Hópurinn borðar saman kveðjukvöldverð en brottför á flugvöllinn er rétt fyrir miðnætti, því flugtak til Istanbúl er kl. 02:25.

Heimferð

Flogið til Istanbul kl. 2.25, þaðan til Brussel og frá Brussel til Keflavíkur kl. 13.50.

Lent er í Keflavík kl. 15.15